Milljónir króna í vasann fyrir að hætta ekki

Sparisjóður Reykjavíkur gerði árið 2004 viðbótarsamning við fjóra lykilstarfsmenn. Samningurinn fól í sér að starfsmennirnir létu ekki af störfum eða réðu sig annað. Um var að ræða eingreiðslur upp á 1-2 milljóna króna á ári allt til ársins 2007.

Í skýrslu um fall sparisjóðanna, sem kynnt var í dag, er greint frá stærstu samningum sem gerðir voru við einstaka starfsmenn.

Árið 2004 var samið um starfsflok framkvæmdastjóra fjármálasviðs sem fékk auk árslauna tólf milljóna króna eingreiðslu og ívilnun vegna bifreiðar. Árið eftir voru gerðir starfslokasamningar við tvo starfsmenn sem fengu tvær milljónir í eingreiðslu umfram hefðbundnar starfslokagreiðslur.

Framkvæmdastjóri SPRON-Verðbréfa hf. fékk 10,1 milljón króna kaupauka árið 2006 og annar starfsmaður 3 milljónir króna í eingreiðslu til viðbótar við ráðningarsamning. Þá var undirritaður starfslokasamningur við einn starfsmann sem fól í sér fjögurra milljóna króna bónus.

Þá fékk framkvæmdastjóri Frjálsa fjárfestingarbankans 10,5 milljónir króna í eingreiðslu árið 2005 og kaupauka í formi níu mánaðarlauna árin tvö á eftir. Þá fengu fimm starfsmenn bankans eingreiðslu, samtals 43,3 milljónir króna, í upphafi árs 2009 vegna samninga sem sem undirritaðir voru á árunum 2005-2006 sem viðbót við ráðningarsamning ef starfsmennirnir létu ekki af störfum fyrir félagið.