21 mál gæti varðað fangelsisrefsingu

Rannsóknarnefnd Alþingis um fall sparisjóðanna tilkynnti 21 mál til ríkissaksóknara. Öll málin geta varðað fangelsisrefsingu.

Þetta kemur fram í skýrslu nefndarinnar sem birt var í dag. Ekki er þó gert grein fyrir einstökum málum í skýrslunni. Gert er ráð fyrir því að ríkissaksóknari sendi málin áfram til handhafa ákæruvalds eða viðkomandi yfirvalda sem fer með rannsókn þeirra mála sem tilkynnt voru. Fjármálaeftirlitið og embætti sérstaks saksóknara eru umrædd yfirvöld í flestum tilfellum.

Sérstökum saksóknara hafa þegar verið send upplýsingar um þau mál þar sem grunur vaknaði um brot gegn lögum sem saksóknari fer með ákæruvald í. Um er að ræða mál þar sem grunur vaknaði að auðgunarbrot hefðu verið framin.

Með sama hætti voru Fjármálaeftirlitinu afhentar upplýsingar um þau mál þar sem grunur lék á um brot gegn lögum um fjármálafyrirtæki.

Hrannar Hafberg, formaður rannsóknarnefndarinnar, sagði á fundinum í dag að bær yfirvöld yrðu að meta hvort atriðin kalli á frekari rannsókn.

„Hugsanlega kunna einhver þeirra mála sem tilkynnt voru til yfirvalda að vera fyrnd, kunna þegar að vera til rannsóknar eða rannsóknum kann að vera hætt,“ sagði Hrannar. Því væru málin 21, sem tilkynnt voru til ríkissaksóknara, ekki tíunduð nákvæmlega í skýrslunni.

Endurskoðendur sakaðir um að semja ársreikninga

Margir viðmælendur starfsfólks Rannsóknarnefndar Alþingis um fall sparisjóðanna greindu frá því að endurskoðendur hefðu hreinlega samið ársreikninga fyrir sjóðina. Vísbendingar um það var jafnframt að finna í stjórnarfundargerðum sparisjóðanna.

Þeir endurskoðendur sem rannsóknarnefndin tók skýrslur af vísuðu því algjörlega á bug. Þeir sögðust aðeins hafa veitt sumum sparisjóðum tæknilega ráðgjöf við lokafrágang ársreikningsins eins og segir í skýrslunni.

Bentu endurskoðendurnir jafnframt á að margir af minni sjóðunum hefðu verið það fáliðaðir að það væri í raun ómögulegt fyrir þá að ganga frá ársreikningi sínum án utanaðkomandi aðstoðar.

Þá kemur fram í skýrslunni að reikningar frá endurskoðendafyrirtækjum til sparisjóðanna hafi borið það með sér að þeir hefðu unnið ýmsis önnur verk en að endurskoða. Flestir sparisjóðirnir keyptu til dæmis innri endurskoðun af sama endurskoðunarfyrirtæki og sá um ytri endurskoðun. Það hafi verið heimilt til 2010.

Sum verk, eins og þau voru tilogreind á reikningum til sparisjóðanna, hafi verið þess eðlis að spurningar vöknuðu um hvort óhæði endurskoðendanna hefði verið hafið yfir vafa.