Ég ólst upp á Playboy-setrinu

„Móðir mín var leikfélagi og kærasta Hughs Hefner á árunum 1976 til 1981. Ég eyddi miklum tíma á Playboy-setrinu þegar ég var að alast upp í Los Angeles. Mamma fór fyrst með mig þangað árið 1988 þegar ég var þriggja mánaða gömul og ég hef farið oft í heimsókn síðan,“ skrifar grínistinn Katie Manzella. Hún er dóttir fyrrverandi Playboy-leikfélaga sem var kölluð Baby Blue en Baby Blue var kærasta Playboy-kóngsins Hughs Hefner.

Katie skrifar um tímann með Hugh á Playboy-setrinu á vefsíðu tímaritsins Cosmopolitan. Hún segir að móðir hennar hafi kynnst Hugh í partí þegar hún var nítján ára.

„Playboy-setrið var meira eins og fjölskyldustaður fyrir mig. Það var ekki villt og brjálað eins og allir gætu haldið. Við borðuðum saman, horfðum á bíómyndir og fengum okkur sundsprett í sundlauginni – ekkert stórmál. Ég vissi að ég var á töfrastað þegar ég var lítil en fyrir mér var hann venjulegur. Ég sá fullt af stjörnum þarna. Ég fór á fyrsta stefnumótið mitt með frægum manni sem ég hitti þarna en ég vil halda nafni hans leyndu,“ skrifar Katie. Hún segist hafa hugleitt það að gerast leikfélagi þegar hún var unglingur.

„Ég er glöð að ég gerði það ekki. Það getur verið frábært en önnur hlið starfsins er ljót. Ég hefði gert það ef það hefði reynst móður minni auðveldara. En ég sá hvað það gerði henni sem er ástæða þess að ég ákvað að lifa lífi mínu á annan hátt.“

Hún ber Hugh góða söguna.

„Ég held að Hugh sé sá eini sinnar tegundar og það er gott fyrir hann en það var erfitt fyrir móður mína.“

Bréfið í heild sinni má lesa hér.