Óþarfa viðkvæmni fyrir 1. apríl

Engin skýring hefur verið gefin á því að ríkisstjórnin hætti við að mæla fyrir skuldaniðurfellingarfrumvörpum sínum á Alþingi í dag. Þingflokksformaður Samfylkingarinnar segir að svo virðist sem forsætisráðherra hafi verið viðkvæmur fyrir dagsetningunni 1. apríl en þingflokksformaður Sjálfstæðisflokks segir það ekki fá staðist.

Formenn stjórnarflokkanna kynntu frumvörp um niðurfærslu höfuðstóls verðtryggðra húsnæðislána og heimild til notkunar séreignarsparnaðar til lækkunar húsnæðislána á miðvikudag í síðustu viku. Samkomulag var gert við stjórnarandstöðuna um að Bjarni Beneditksson fjármálaráðherra mælti fyrir báðum frumvörpunum á Alþingi í dag, hinn 1. apríl,  en í gær tilkynnti forseti Alþingis að umræðunni yrði frestað til morgundagsins.

Helgi Hjörvar, þingflokksformaður Samfylkingarinnar, kallaði frumvörpin aprílgapp á Alþingi í gær. Engar skýringar hafi verið gefnar á frestun umræðunnar.

„Þetta er gert alveg fyrirvaralaust og það virðist einfaldlega vera þannig að forsætisráðherra hafi verið viðkvæmur fyrir því að efndir á stærsta kosningaloforðinu yrðu til umfjöllunar á 1. apríl,“ segir Helgi.

Ragheiður Ríkharðsdóttir, þingflokksformaður Sjálfstæðisflokksins, segir forseta Alþingis ekki hafa gefið neina skýringu á frestun umræðunnar. Hann hafi einfaldlega orðið við ósk framsögumanns, fjármálaráðherra, um frestun eins og forseti geri oftast sé eftir slíku óskað.

Heldur þú að menn séu eitthvað feimnir við dagsetninguna, 1. apríl;  að frumvörpin yrðu kennd við þann dag í framtíðinni?

„Ég hef nú enga trú á því að jafn ágæt tillaga eins og þessi, skuldaleiðréttingartillaga varðandi verðtryggð fasteignalán sem og um séreignarsparnaðinn; að forsytumenn ríkisstjórnarinnar séu smeikir við að leggja það fram. Það er af og frá,“ segir Ragnheiður.

„Það er alla vega erfitt að sjá að það sé eitthvað mikilvægara sem fjármálaráðherra hafi að gera í dag en að mæla fyrir stærsta máli ríkisstjórnarinnar. Það var samið um að þetta yrði gert í síðustu viku og við ætluðum að greiða fyrir málinu til nefndar á morgun. Það frestast núna um heila viku vegna þessa. Þannig að þetta er óskiljanleg viðkvæmni að hálfu forsætisráðherra,“ segir Helgi.

En Ragnheiður segist hins vegar ekki heyra það á stjórnarandstöðunni að nokkur sátt verði um að ræða bæði frumvörpin samtímis á morgun og greiða fyrir því að þessi mál komist til nefndar.

Þannig að þú átt allt eins von á að stjórnarandstaðan fari í það að ræða fundarsköp og svo framvegis á morgun?

„Já,  ég á fastlega von á því að hún muni gera það í dag. Viðbrögðin við þessu voru þannig í gær, að það verður þannig,“ segir Ragnheiður Ríkharðsdóttir.