Hámark hálf milljón á ári

Bjarni Benediktsson, fjármálaráðherra, og Sigmundur Davíð Gunnlaugsson, forsætisráðherra, kynntu lagafrumvarp í dag er snúa að séreignarsparnaði og ráðstöfun hans til greiðslu húsnæðislána og húsnæðissparnaðar.

Fundurinn fór fram í Iðnó í miðborg Reykjavíkur og var sýnt beint frá honum hér á Vísi.

Frumvörpin eiga að lækka húsnæðisskuldir heimila í landinu og auðvelda þeim sem ekki eiga íbúð að kaupa húsnæði. Kemur fram að leiðréttingin nái til rúmlega 100 þúsund heimila og heildarumfang leiðréttingarinnar sé um 150 milljarðar króna.

Eftirfarandi tilkynning var birt á vef Fjármálaráðuneytisins til skýingar á aðgerðum ríkisstjórnarinnar til lækkunar höfuðstóls húsnæðislána.

Frumvarp til laga um séreignarsparnað og ráðstöfun hans til greiðslu húsnæðislána og húsnæðissparnaðar.

Í frumvarpinu eru lagðar til breytingar á lögum nr. 129/1997 um skyldutryggingu lífeyrisréttinda og starfsemi lífeyrissjóða, lögum nr. 90/2003 um tekjuskatt og lögum nr. 44/1998 um húsnæðismál.

Efni frumvarpsins má í grófum dráttum skipta í tvennt:

Annars vegar er lagt til úrræði sem heimilar fjölskyldu að ráðstafa séreignarsparnaði inn á veðlán sem tekin eru vegna íbúðahúsnæðis til eigin nota. Skilyrði er að lánin séu tryggð með veði í íbúðarhúsnæði og að þau séu grundvöllur til útreiknings vaxtarbóta. Hér undir falla einnig lánsveðslán ef þau uppfylla sömu skilyrði.

Hins vegar er lagt til úrræði sem heimilar ráðstöfun iðgjalda sem safnast hafa upp á tilteknu tímabili til kaupa á íbúðarhúsnæði til eigin nota (húsnæðissparnaður).

Í báðum tilfellum er um að ræða tímabundin, skattfrjáls úrræði til þriggja ára þegar um er að ræða greiðslu/ráðstöfun iðgjalda inn á lán, en í fimm ár í tilviki húsnæðissparnaðar.

Grunnviðmið eru þessi í báðum tilvikum:

Heimili; fjölskyldur og einstaklingar.

Með fasteign er átt við íbúðarhúsnæði til eigin nota.

Gildistíminn takmarkast við þau iðgjöld sem greidd eru vegna tímabilsins 1. júlí 2014 til 30. júní 2017.

Hámarksfjárhæð á ári er samtals 500 þúsund kr. á fjölskyldu og fasteign (samtals 1,5 milljónir kr. á þremur árum).

Hámarksiðgjald, 4% frá launþega og 2% frá launagreiðanda.

Einstaklingur sparar a.m.k. 2% eða til jafns við framlag launagreiðanda, ef það er lægra en 2%.