Lúxusmerkin horfa til ungra karla

Framleiðendur lúxusvara eru í sífellt meira mæli farnir að horfa til ungra karlmanna og framleiða vörur sem til þeirra höfða. Flestir tengja lúxusmerkin við þarfir kvenna en sérfræðingar hjá HSBC segja að þessi þróun í átt til karlmanna sé nú afar áberandi.

Hinn dæmigerði karlmaður sem tískuhúsin og aðrir framleiðendur lúxusvarnings horfa nú til er á þrítugs- eða fertugsaldri, borgarbúar sem hrifnir eru af farsímum og hugsi afar mikið um ímynd sína. Þessir karlmenn hafi innri þörf fyrir að sanna fyrir umheiminum að þeir séu flottir og eyða því miklu í sínar gerviþarfir um leið og þeir hafi efni á því. Öðru gildi um enn efnaðri og eldri karlmenn sem hafi ekki eins mikið að sanna og hafi í reynd engan áhuga á því.

Eitt af því sem þeir hjá HSBC segja mikinn áhrifamátt þessarar þróunar er að karlmenn gifti sig nú seinna en áður og því eigi þeir pening til eyðslu í lúxusvarning, sem áður hefði farið í að haldu upp fjölskyldu sinni. Því fari það fé sem áður var eytt í bleyjur í flott armbandsúr, handunna leðurskó, dýrar töskur og sérsaumuð jakkaföt.

Tískuvöruframleiðandinn Coach hefur á síðustu árum lagt mikla áherslu á unga karlmenn á framabraut og hefur sala á karlmannsvarningi sjöfaldast frá árinu 2010. Ekki er ósvipaða sögu að segja frá Burberry og framleiðandanum Michael Kors, sem ætlar að sjöfalda tekjur sínar líka í sölu varnings fyrir karlmenn. Eini markaðurinn þar sem ekki tekur því að höfða til karlmanna er í Kína, en þar er gósentími lúxusvarnings fyrir konur.