„Þessi hækkun er alveg glórulaus“

Pétur Sigurgunnarsson hefur glímt við kæfisvefn í 13 ár og sefur hann allar nætur með sérstaka kæfisvefnsgrímu. Kostnaður sjúklingsins af hjálpatækinu hefur hækkað um 77%.

„Ég er einn af mörg þúsund manns á Íslandi sem þarf að sofa með svokallaða kæfisvefnsgrímu,“ segir Pétur Sigurgunnarsson, í samtali við Vísi.

Heilbrigðisþjónusta hækkaði um tæp 5% í janúar að því er fram kom í vísitölumælingu Hagstofunnar í liðinni viku en þetta kemur fram í fréttatilkynningu frá ASÍ.

Sem dæmi um áhrif einstakra breytinga má nefna að kostnaður sjúklings af hjálpartæki vegna kæfisvefns fór úr 18.000 krónum á árinu 2013 í 31.800 krónur í ár, sem er 77% hækkun.

„Áður fyrir þurfti ég að greiða 4500 krónur í þjónustu gjald á þriggja mánaða fresti sem gerir 1500 krónur á mánuði. Núna fékk ég greiðsluseðil frá Landsspítalanum upp á 2650 krónur og fékk ég þær skýringar að um væri að ræða mánaðargjald.  Ég greiði því 7950 krónur fyrir þjónustu sem ég hef áður greitt 4500 krónur fyrir.“

Kæfisvefn er ástand sem einkennist af endurteknum öndunartruflunum í svefni ásamt  syfju þegar fólk er vakandi. Hjá fullorðnum telst það öndunarhlé ef öndunin hættir alfarið í 10 sekúndur eða lengur.

Öndunarhlé í kæfisvefni verða oftast vegna þrengsla eða lokunar í efri hluta  öndunarvegarins. Þá reynir einstaklingurinn að ná andanum með  sífellt kröftugri innöndunartilraunum. Í löngum öndunarhléum geta komið fram hjartsláttartruflanir. Öndunarhléin valda einnig hækkun á blóðþrýstingi.

„Maður hættir reglulega að anda í svefni þegar maður glímir við kæfisvefn og þá fær blóðið ekki súrefni. Menn hafa áður fengið hjartastopp vegna kæfisvefns og því lífsins nauðsynlegt að sofa með þessar grímur. Það er allt í lagi að borga sanngjarnt gjald en þessi hækkun er alveg glórulaus.“

Pétur Sigurgunnarsson hefur glímt við kæfisvefn í 13 ár og sefur hann allar nætur með sérstaka kæfisvefnsgrímu. Kostnaður sjúklingsins af hjálpatækinu hefur hækkað um 77%.