„Menn munu fylgjast vel með í kvöld“

Jóhann D. Bianco, íbúi í Keflavík, hvetur Keflvíkinga og Suðurnesjamenn til þess að vera á varðbergi fyrir vafasömum einstaklingum á skemmtistöðum bæjarins í kvöld, jafnt sem önnur kvöld. Hann leggur til að tekið verði upp svokallað „buddy system“ þar sem djammarar í Reykjanesbæ, og reyndar á landinu öllu, fylgjast með sínum nánustu, sem og öðrum í kringum þá.

„Þetta er ástand sem er nýtilkomið hér í Keflavík,“ segir Jóhann, og vísar þá til frétta af lyfjum sem laumað hefur verið í drykki fólks á skemmtistöðum undanfarið. Jóhann skrifaði færslu á Facebook þar sem hann ávarpar íbúa á Suðurnesjunum og hvetur til hópátaks. „Við þurfum að láta alla okkur varða og láta dyraverði vita um leið og við verðum vör við eitthvað vafasamt,“ segir hann í samtali við Vísi.

Vinkona Jóhanns lenti í því um daginn á skemmtistað í Keflavík að ólyfjan var laumað í glas hennar. Jóhann var að skemmta sér með henni það kvöld.

„Hún var á allt öðru leveli en vanalega. Það var búið að setja eitthvað í drykkinn hennar. Það var farið með hana á sjúkrahús og síðan tók lögreglan skýrslu. Þá fóru menn að líta í kringum sig. Það eru búnir að vera einhverjir útlendingar á vappi í kringum stelpurnar, að stela símum og fleira. Ég ætla ekki að persónugera neitt eða saka einhvern ákveðinn hóp um þetta, en ég neita að trúa því að það séu einhverjir Íslendingar á Suðurnesjunum að gera þetta. En auðvitað veit maður aldrei. Menn munu allavega fylgjast vel með í kvöld og næstu helgar“