Bálreiðir framhaldsskólakennarar funda í fyrramálið

Formaður Félags framhaldsskólakennara segir samninganefnd ríkisins hafa næstu viku til að skýra afstöðu sína við samningaborðið. Eftir það taki kennarar ákvörðun um hvort farið verði í aðgerðir.

Bálreiðir framhaldsskólakennarar boða til samstöðufunda í framhaldsskólum um allt land í fyrramálið og á meðan liggur kennsla niðri. Formaður þeirra segir að línur verði að skýrast við samningaborðið á allra næstu dögum en að öðrum kosti fari kennarar að undirbúa aðgerðir.

Það hefur legið fyrir í meira en mánuð að Félag framhaldsskólakennara sættir sig ekki við kjarasamning á sömu nótum og samið var um nýverið á almennum markaði. Formaður Félags framhaldsskólakennara segir þá hafa dregist aftur úr sambærilegum stéttum hjá hinu opinbera mörg undanfarin ár og nú sé þolinmæðin á þrotum.

Kjaradeilu framhaldsskólakennara við ríkið var vísað til Ríkissáttasemjara síðast liðinn miðvikudag eftir margra vikna árangurslausar viðræður og segir formaðurinn þá langt í frá sátta við stöðu viðræðnanna.

„Kennarar eru bálreiðir yfir því hvernig ástandið er í stöðu samningamálanna og yfir andvaraleysi, stefnuleysi stjórnvalda og stjórnmálamanna til margra ára gagnvart kennarastarfinu, launum fyrir kennarastarfið og rekstri skólanna,“ segir Aðalheiður Steingrímsdóttir formaður Félags framhaldsskólakennara.

Formenn kennarafélaganna boða til samstöðufunda í öllum framhaldsskólum landsins klukkan korter yfir ellefu í fyrramálið og fellur kennsla niður á meðan.

„Til þess að ræða þessa alvarlegu stöðu og ég sé ekki betur en menn ætli að bregðast mjög vel við því,“ segir Aðalheiður.

Búast megi við hörðum ályktunum að þeim fundum loknum. Aðalheiður segir að tíminn við samningaborðið sé að renna út og það styttist í að kennarar meti hvort farið verði í aðgerðir eins og verkfall.

„Og þá er ég að tala um næstu daga og næstu viku. Í kjölfarið munum við eiga samræður við formenn kennarafélaganna í skólunum og trúnaðarmenn til að gera þeim grein fyrir stöðunni og okkar mati á henni,“ segir Aðalheiður Steingrímsdóttir formaður Félags framhaldsskólakennara.