Fimm innbrot á þremur tímum í nótt

Hrina innbrota varð á þriggja klukkustunda tímabili í nótt þegar brotist var inn á fimm stöðum. Lögregla hafði hendur í hári flestra þjófanna.

Fyrst var tilkynnt um húsbrot í Lindahverfi þar sem maður í annarlegu ástandi fór inn í íbúð. Húsráðendur gátu komið honum út og lögregla handtók hann skömmu síðar.

Svo var maður undir áhrifum fíkniefna handtekinn við verslun í miðborginni þar sem hann var til vandræða.

Þvínæst var innbrotsþjófur handtekinn inni í apóteki í Garðabæ þar sem hann var að leita lyfja. Hann hafði skorist á höndum og fæti og þurfti aðhlynningu á slysadeild, áður en hann var vistaður í fangageymslu til að sofa úr sér.

Síðan var brotist inn í íbúðarhús í Kópavogi en lögreglan náði að hlaupa þjófinn uppi og handtaka, enda var hann valtur á fótunum.

Þá var tilkynnt um innbrot í fataverslun í Hafnarfirði,  en þjófurinn komst undan og ekki er vitað hverju hann stal.

Loks var svo tilkynnt um innbrot í fyrirtæki í ausutrboerginni og sáust tveir menn á hlaupum þaðan. Lögregla náði öðrum þeirra og er hann vistaður í fagnageymslum.