Brot úr sögu þjóðar

Annað kvöld opnar í Hönnunarsafni Íslands sýningin Ertu tilbúin frú forseti? Þar verður hægt að skoða ýmiskonar fatnað og fylgihluti úr forsetatíð frú Vigdísar Finnbogadóttur.

„Það fylgja minningar öllum hlutunum hér inni," segir Vigdís.

Á sýningunni kennir sem sé ýmissa grasa og þarna má sjá flíkur sem margir þekkja af fréttamyndum og víðar. Meðal annars fallegur heimaprjónaður kjóll sem Vigdís fékk sendan frá konu sem hún þekkti ekkert.

„Hún hafði samband við mig í kosningabaráttunni og sagði að ég yrði að klæðast kjólnum ef ég næði kjöri. Ég varð við þeirri áskorun."

Vigdís klæddist kjólnum heimaprjónaða þegar ljóst var að hún var fyrsta konan í heiminum sem kjörin var þjóðhöfðingi á lýðræðislegan hátt af þjóð sinni. Vigdís var forseti Íslands í 16 ár. Á sýningunni má því sannarlega sjá brot úr sögu þjóðar. Til að mynda er skemmtileg sagan af því þegar Vigdís var að vandræðast með að hafa ræður sínar meðferðis í opinberum heimsóknum.

„Það var ekki búið að finna það upp að konur þyrftu að flytja ræður, því það var aldrei pláss fyrir ræðurnar í samkvæmistöskum kvenna. Það þurfti alltaf einhver að hlaupa til eða ég varð að böðla henni saman í töskuna mína," segir Vigdís.

„Þetta frétti Dior í París,  að konuna vantaði tösku til að geyma ræðurnar sínar í. Hann hannaði svona flatar breiðar töskur og sendi mér eina hvíta og svo keypti ég seinna töskur í sama stíl til að geyma ræðurnar.“

Viðtalið við Vigdísi má sjá í heild sinni á meðfylgjandi myndskeiði.