Milliganga verði gerð refsiverð

„Það er vitað um ólögmæta háttsemi í þessu sem er ólíðandi og ég tel að við eigum að leita réttarbóta fyrir fólk í þessari stöðu. Síðan er spurning nákvæmlega hvernig það verður gert,“ segir Kristján Þór Júlíusson heilbrigðisráðherra í samtali við Fréttablaðið en hann flutti skýrslu um staðgöngumæðrun í velgjörðarskyni á Alþingi í gær.

Ekki var einhugur meðal þingmanna um málið en samkvæmt skýrslunni skal stefnt að útfærslu frumvarps sem heimilar staðgöngumæðrun.

Stefnt er að útfærslu á frumvarpi þar sem núverandi bann við staðgöngumæðrun verður fellt úr gildi og heimild veitt til að framkvæma tæknifrjóvgun á konu sem gengur með barn í velgjörðarskyni til að afhenda það öðru fólki eftir fæðingu.

Þeir sem taka þátt í ferlinu munu þurfa að uppfylla ákveðin skilyrði og hæfni þeirra metin. Gengið verður út frá því að sú kona sem gengur með og fæðir barnið sé móðir þess og sérstök ættleiðing fari fram eftir ­fæðingu barnsins að liðnum ákveðnum umþóttunartíma.

„Það þarf að svara mörgum spurningum bæði lögfræði- og siðferðislegum, við vinnuna framundan,“ segir Kristján.

Staðgöngumæðrun í hagnaðarskyni verði bönnuð sem og að auglýsa og kynna staðgöngumæðrun. Þá verði hvort tveggja refsivert. Milliganga um að gera samninga við erlenda aðila sem bjóða upp á þjónustu staðgöngumæðra verði einnig refsiverð sem og samningar sem gerðir eru við slíka erlenda aðila. Afmarka verði vel hvaða greiðslur fari milli aðila vegna kostnaðar.