Búið að slökkva eldinn

Eldur kom upp á annarri hæð í austurenda húsnæðis skiltagerðarinnar Dengsa ehf. við Dugguvog. Tilkynningin barst klukkan 12:15 og var allt tiltækt slökkvilið kallað á staðinn. Kalla þurfti út viðbótarmannskap, að sögn slökkviliðs. Búið er að slökkva eldinn en slökkviliðið er enn að störfum.

Fréttamaður Vísis sem var á staðnum segir eiganda skiltagerðarinnar hafa verið á staðnum klukkan 12, fimmtán mínútum áður en tilkynningin barst, en þá hafði hann brugðið sér frá. Samstarfsmaður á neðri hæð varð eldsins ekki var fyrr en internetsamband rofnaði. Fór hann þá að athuga hvað gæti verið að og mætti honum þá eldur og reykur.

Götum var lokað í hverfinu, reykurinn var gríðarlegur og að sögn slökkviliðs tilkynntu fjölmargir um eldinn. Slökkvilið beindi þeim tilmælum til fólks í nágrenninu að loka gluggum og kynda ofna, þar sem það minnkar líkurnar á að reykur komi inn.

Að sögn sjónarvotta lagði mikinn reyk frá húsinu og barst hann víða. Bárust til dæmis fregnir af því að loka hafi þurft gluggum á skrifstofu í Skeifunni vegna reyksins.

Lesandi Vísis, Karl Karlsson, sendi okkur meðfylgjandi myndband af brunanum.