Innlent

Mikilvægasti samningurinn frá undirritun EES

Heimir Már Pétursson skrifar
Allur þorri þingmanna samþykkti fríverslunarsamning við Kína í gær. Össur Skarphéðinsson segir þetta mikilvægasta samninnginn frá undirritun EES.
Allur þorri þingmanna samþykkti fríverslunarsamning við Kína í gær. Össur Skarphéðinsson segir þetta mikilvægasta samninnginn frá undirritun EES.

Fyrrverandi utanríkisráðherra segir fríverslunarsamninginn við Kína mikilvægasta utanríkisviðskiptasamning sem þjóðin hafi gert frá því samningurinn um Evrópska efnahagssvæðið var undirritaður. Verkalýðshreyfingin hefur aðkomu að vinnumálahluta samningsins.

Þótt flest allir þingmenn hafi mikla fyrirvara á samskiptum við Kínverja vegna stöðu mannréttindamála þar var fríverslunarsamnngur Íslands og Kína samþykktur með öllum þorra atkvæða á Alþingi í gær.

Píratarnir Birgitta Jónsdóttir og Helgi Hrafn Gunnarsson greiddu ein atkvæði á móti og Bjarkey Gunnarsdóttir og Ólafur Gunnarsson þingmenn Vinstri grænna sátu hjá ásamt Jóni Þór Ólafssyni þingmanni Pírata.

Gunnar Bragi Sveinsson utanríkisraðherra rifjaði upp við atkvæðagreiðsluna í gær að samningurinn hefði átt sér langan aðdraganda en fyrst hafi verið skrifað undir samkomulag um að hefja viðræður í desember 2006.

„Nú um sjö árum síðar og fjórum utanríkisráðherrum, sér fyrir endann á vinnunni. Ég hef trú á að samningurinn skapi mikil viðskiptatækifæri og tækifæri til að efla samskipti okkar við Kína á öðrum sviðum,“ sagði utanríkisráðherra. Í samningnum væri kveðið á um vinnumál sem byði upp á umræður um stöðu mannréttndamála og aðkoma samtaka launafólks að samkomulaginu væri tryggð.

Birgitta Jónsdóttir skoraði á stjórnvöld að feta í fótspor Kanadamanna og Bandaríkjamanna og skora á Kínverja að mótmæla dómi yfir lögfræðingnum Xu Zhiyong sem nýlega var dæmdur í fjögurra ára fangelsi fyrir að gagnrýna stjórnvöld.

„Ég skora líka á þingmenn að átta sig á því að við munum ekki komast út úr þessu faðmlagi nema að ganga í ESB þegar verktakafyrirtækin byrja að fara á hausinn.

Össur Skarphéðinsson fyrrverandi utanríkisráðherra fagnaði staðfestingu samningsins.

„Alþingi er að stíga hér sögulegt skref. Þetta er mikilvægasti utanríkisviðskiptasamningur sem Íslendingar hafa gert frá því við gerðum samninginn um Evrópska efnahagssvæðið,“ sagði Össur.

Samningurinn fæli í sér afnám 12 prósent tolla á sjávarafurðir og tækifæri fyrir landbúnaðinn og opnaði gríðarleg tækifæri fyrir íslenskt atvinnulíf.

„Þess vegna styð ég þennan samning heils hugar og styð hæstvirta ríkisstjórn og þakka henni fyrir að hafa lokið því góða verki sem fyrri ríkisstjórn hóf í þessum efnum“ sagði Össur Skarphéðinsson.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.