Efri hæðin gjörónýt

Efri hæð hússins við Dugguvog þar sem eldur kom upp í hádeginu er gjörónýt.

Eldurinn kom upp á annarri hæð í austurenda húsnæðis skiltagerðarinnar Dengsa ehf. en eigandi skiltagerðarinnar var á staðnum klukkan 12, fimmtán mínútum áður en tilkynningin barst, en hafði brugðið sér frá.

Samstarfsmaður á neðri hæð varð eldsins ekki var fyrr en internetsamband rofnaði. Fór hann þá að athuga hvað gæti verið að og mætti honum þá eldur og reykur.

Slökkvilið er enn að berjast við reyk og glæður í þaki hússins. Þeir reyna að koma í veg fyrir að eldur berist í vesturenda hússins, þar sem pípulagningaverkstæði er til húsa.

Ljósmyndari Vísis var á staðnum og tók eftirfarandi myndir.