67,5% vilja þjóðaratkvæðagreiðslu um ESB

67,5% þjóðarinnar vilja að haldin verði þjóðaratkvæðagreiðsla um um framhhald viðræðna Íslands við Evrópusambandið. 32,5% vilja ekki að þjóðaratkvæðagreiðsla verði haldin. Þetta kemur fram í niðurstöðum könnunar sem fyrirtækið Maskína gerði fyrir samtökin Já Ísland.

Stuðningur við þjóðaratkvæðagreiðslu er yfirgnæfandi í öllum aldurshópum. 80,4% fólks yngra en 25 ára vill þjóðaratkvæðagreiðslur og er stuðningurinn mest afgerandi í þeim aldurshópi.

60,4% þeirra sem segjast styðja Sjálfstæðisflokkinn og 60,6% stuðningsmanna Framsóknarflokksins eru fylgjandi þjóðaratkvæðagreiðlsunni. Mestur stuðningur mældist hjá stuðningsmönnum Bjartrar Framtíðar, eða 72,9%.

Eini landshlutinn sem er andvígur þjóðaratkvæðagreiðslunni er Austurland, en þar eru 52,1% andvígir og 47,9% hlynntir.

Spurningalisti var lagður fyrir Þjóðgátt Maskínu á netinu frá 10. til 20. janúar á þessu ári. 1078 svör bárust og tóku Íslendingar frá aldrinum 18 til 75 ára þátt. Gögnin voru vigtuð við úrvinnslu, með tilliti til kyns, aldurs og búsetu í samræmi við upplýsingar frá þjóðskrá svo að svörin endurspegli sem best afstöðu þjóðarinnar.