Útgáfutónleikar hjá Mammút í kvöld

Tónleikagestir eiga von á góðu, segja liðsmenn hljómsveitarinnar Mammút sem heldur útgáfutónleika í Gamla bíói í kvöld. Nýjasta afurð sveitarinnar, Komdu til mín svarta systir, hefur fengið einróma lof gagnrýnenda og hlaut hún sjö tilnefningar til íslensku tónlistarverðlaunanna.

Fimm ár eru frá því að Mammút hélt síðast útgáfutónleika en jafnlangt er síðan önnur skífa sveitarinnar kom út. En hvers vegna þessi langa bið?

„Við vorum bara ekki tilbúin til að gefa út þessa plötu fyrr en núna,“ segir Katrína Mogensen, söngvari og hljómborðsleikari Mammút.



Arnar Pétursson, annar tveggja gítarleikara Mammút tekur undir með Katrínu.

„Platan var svona lengi í vinnslu því við vönduðum okkur svo mikið, núna var rétti tímapunkturinn.“

Og svo virðist sem vandvirknin hafi borgað sig sé mið tekið af viðtökum almennings sem og gagnrýnenda. Platan var til að mynda valin sú besta á síðasta ári af sérfræðingum Fréttablaðsins.

„Þessi plata virðist leggjast vel í fólk sem er mjög ánægjulegt,“ segir Katrína.

En hverju mega tónleikagestir eiga von á í kvöld?

„Við ætlum að vanda okkur og gera þetta vel,“ segir Arnar og bætir við að Komdu til mín svarta systir verði spiluð í heild sinni auk annars efnis.