Ferðakostnaður forseta tæplega átta milljónir

Ólafur Ragnar Grímsson, forseti Íslands, var alls 94 daga erlendis á síðasta ári. Nam kostnaður við embættisferðir hans tæplega átta milljónum króna.

Þetta kemur fram í svari forsætisráðherra við fyrirspurnSvandísar Svavarsdóttur, þingmanns Vinstri grænna, um ferðalög forseta Íslands og maka hans.

Svandís óskaði eftir svörum við nokkrum spurningum, þar á meðal hversu marga daga forseti var erlendis árið 2013, hverjar utanferða hans voru opinberar og hverjar í einkaerindum.

Alls voru embættisferðir forseta 17 en í svari forsætisráðherra kemur fram að forseti hafi greitt sjálfur fyrir þær ferðir sem hann fór í einkaerindum.

Dýrasta embættisferð forseta var vegna ráðstefna um norðurslóðir í Washington, funda með þingmönnum í öldungadeild Bandaríkjaþings, annarra funda í Washington og þátttöku í ráðgjafanefnd Sameinuðu þjóðanna og Alþjóðabankans um hreina orku. Kostnaður við þá ferð nam um 1,3 milljónum króna. Samanlagður kostnaður við embættisferðirnar 17 var 7.898.570 krónur.

Þá greiddi embætti forseta fargjöld maka forseta í sjö ferðum sem allar voru í tengslum við embættisferðir forseta. Þar er um að ræða opinberar heimsóknir til Frakklands og Þýskalands, heimsmót íslenska hestsins í Berlín, þátttöku í málþingum og ráðstefnum í München og Davos, ráðstefnur og fundi í Washington, krýningarafmæli Karls XVI Svíakonungs og landsleik í Zagreb; alls 914.677 krónur. Enginn annar kostnaður var greiddur vegna ferða maka forseta.

Svör forsætisráðherra við spurningum þingmannsins má lesa á vef Alþingis.