Ný uppfinning á að bjarga grasinu

Nýrri íslenskri uppfinningu er ætlað að koma í veg fyrir milljónatjón á golf- og knattspyrnuvöllum landsins. „Þetta leysir mjög snúið mál," segir Friðrik Tryggvason hjá Almennu umhverfisþjónustunni, sem fann upp búnaðinn.

Um er að ræða gadda sem eru festir undir þungar vinnuvélar sem stingast í gegnum klakabrynju þegar ekið er yfir hana. Tilgangurinn er sá að hleypa súrefni að rotnandi grasi sem liggur undir og koma þannig í veg fyrir kalskemmdir, sem umsjónarmenn golf- og knattspyrnuvalla hafa staðið ráðþrota frammi fyrir seinustu vikurnar. Friðrik kallar uppfinninguna „Klakabanann," en hann hefur þegar sótt um einkaleyfi fyrir henni.

„Við vorum ráðþrota í þessu og búnir að reyna ýmislegt. Svo fæddist þetta bara skref af skrefi," segir Friðrik. „Þetta virkar mjög vel," bætir hann við."

Kalskemmdir af völdum klaka geta valdið milljónatjóni á golf- og knattspyrnuvöllum. Umsjónarmenn vallanna hafa staðið ráðþrota frammi fyrir vandanum en vegna uppfinningar Friðriks er nú lausn í sjónmáli. „Þegar við prófuðum þetta byrjaði að gjósa upp ammoníakslykt úr götunum. Þetta er sett undir þungar vinnuvélar þegar við erum komnir á klakann," segir Friðrik

Friðrik er kominn í samstarf við vélsmiðjunna Héðin um smíði Klakabanans. „Það má útfæra þetta til að nota gegn kali á túnum. Þetta er mjög einfalt og í sjálfu sér ekki dýrt né erfitt í notkun. Ég vona að þetta bjargi miklum verðmætum," segir Friðrik Tryggvason.