„Marijúana ekki skaðlegra en áfengi“

„Eins og oft hefur verið sagt frá, reykti ég gras þegar ég var yngri. Ég lít á það sem ósið, ekki ósvipað öllum sígarettunum sem ég hef reykt stóran hluta lífs míns. En ég held að marijuna sé ekki hættulegra en áfengi,“ sagði Barack Obama Bandaríkjaforseti í ítarlegu viðtali við The New Yorker í gær.

Í viðtalinu útlistaði Obama bæði kosti og galla lögleiðingar kannabisefna, en ríkin Colorado og Washington hafa gert slík efni lögleg. Að mati Obama þarf lögleiðingarferlið að halda áfram. Að mati forsetans komast ríkari einstaklingar oftar upp með neyslu kannabisefna. „Krakkar úr millistéttinni eru líklegri til að komast hjá refsingum þegar þau eru gómuð við reykingar. Fátækari krakkar eru líklegri til að hljóta refsingu því þeir hafa ekki sömu úrræði og þeir sem ríkari eru til þess að komast hjá því að vera refsað óhóflega. Við getum ekki verið með lög sem aðeins hluta fólks er refsað fyrir að brjóta,“ útskýrir Barack Obama.

„Við getum ekki verið með lög sem refsa þeim sem stunda einkaneyslu á kannabisefnum með fangelsisvist, sérstaklega þegar kannski stór hluti fulltrúa löggjafarvaldsins hefur gert slíkt hið sama,“ heldur forsetinn áfram.

Hann segist þó vel gera sér grein fyrir röksemdum þeirra sem eru gegn lögleiðingu. „Einhver gæti komið með ákveðinn skammt af kókaíni og fundið út að hann geri minni skaða en vodkapeli. En við þurfum að gera okkur grein fyrir því að harðari efnin eru skaðlegri, bæði fyrir einstaklinginn og fyrir samfélagið.“