Fann svipaða flík á netinu á fimm sinnum lægra verði en á Íslandi

Bloggarinn Elsa Harðar sagði frá því í gær að hún hafi fundið svipaðar kimono flíkur á eBay og hún keypti í versluninni Aftur á miklu lægra verði. 

„En þannig er mál með vexti að á mínum daglega Ebay rúnti fann ég óþægilega líkan, já eða bara alveg eins kimono frá heildsölu í Kína á 30 dollara,“ bloggar Elsa. 

Bára Hólmgeirsdóttir eigandi verslunarinnar Aftur svarar Elsu, í samtali við Vísi: „Ég get ekki kommenterað á hvað fólk finnur á eBay. Fólk getur verið heppið,“ útskýrir hún.

Verslunareigandinn segist ekkert vita um flíkurnar sem Elsa fann á netinu. „Eina sem mér dettur í hug er að stundum þegar fatahönnuðir láta verksmiðjur fjöldaframleiða föt fyrir sig eru fleiri föt framleidd en hönnuðurinn bað um. Svo eru þessi umfram föt seld ódýrt. En ég veit ekki hvort það á við í þessu tilviki. Ég veit í raun bara ekkert um þessar flíkur sem hún talar um," segir Bára.

Elsa veltir líka fyrir sér hvað sé hönnun Aftur og hvað ekki. „Ég veit ekki hvort Aftur panti kimonoana að utan og selji sem sína hönnun, hvort þetta sé einfaldlega copy/paste dæmi eða bara ótrúleg tilviljun.“

Bára vill taka það skýrt fram að þessar flíkur séu alls ekki seldar sem hönnun Aftur. „Þetta er augljóslega ekki frá okkur. Við kaupum þessar flíkur frá Bandaríkjunum. Allar flíkurnar sem við hönnum eru endurunnar og þessar sem hún talar um eru það greinilega ekki. Um 60% af því sem við seljum í búðinni okkar er eitthvað sem við kaupum að utan.“ útskýrir hún.

„Í raun kemur mér ekki við hvað fólk verslar á netinu. Ég kaupi inn gæðavöru og við bjóðum kimono-flíkur á lægra verði en margar aðrar verslanir. Ég vildi bara að þessi stúlka hefði haft samband við mig beint, þá hefði hún getað fengið beint svar,“ segir Bára. 

Elsa hefur nú þegar pantað sér tvo kimonoa, á 8680 krónur.