Bæjarstjóri verður að fara eftir samþykktum bæjarstjórnar Kópavogs

Oddviti Samfylkingarinnar í Kópavogi segir að bæjarstjóra beri að vinna eftir samþykkt bæjarstjórnar um húsnæðismál frá því í síðustu viku. Nú þegar sé til heimild til kaupa á 15 félagslegum íbúðum og drífa þurfi hönnunarvinnu vegna tveggja fjölbýlishæusa af stað.

Sérkennnileg pólitísk staða er komin upp í bæjarstjórn Kópavogs eftir að nýr meirihluti myndaðst á bæjarstjórnarfundi á þriðjudag í síðustu viku um félagsleg húsnæðismál. Guðríður Arnardóttir oddviti Samfylkingarinnar í bæjarstjórn segir næstu skref að séu að reyna að fá Ármann Kr. Ólafsson bæjarstjóra og oddvita Sjálfstæðismanna til verka samkvæmt samþykktinni.

„Honum ber náttúrlega að vinna að þessu máli samkvæmt samþykkt bæjarstjórnar og mér heyrist á hans málflutningi að hann ætli ekki að ganga rösklega til verks,“ segir Guðríður. En hvað þarf að gera?

„Í fyrsta lagi eru til peningar til að kaupa fimmtán félagslegar leiguíbúðir. Það þarf að setja starfsmenn í það að kíkja í kring um sig og fara að versla,“ segir Guðríður.

Þá þurfi að finna þeim tveimur fjölbýlishúsum sem samþykkt var að byggja stað og hefja hönnunarvinnu og fara í útboð.

„Og það sem mestu máli skiptir er að í millitíðinni þarf bæjarstjóri að leggja fram viðauka við fjárhagsáætlun til þess að við fáum formlega heimildir til þessara fjárútláta. Samhliða þarf hann að gera grein fyrir því að við ætlum að fá þessa fjármuni af lóðasölu sem kemur inn á árinu, þegar við úthlutum landi í Vatnsendahlíð og á Glaðheimalandinu,“ segir oddviti Samfylkingarinnar.

Nánari útfærsla á fjárhagshlið tillögunnar verði væntanlega lögð fram á bæjarstjórnarfundi í næstu viku og ætti að vinnast í samstarfi við starfsmenn bæjarins.

„Verkefnið í það heila mun kosta undir tveimur milljörðum. Þetta verða eitthvað í kring um 1,8 milljarðar. Ég gæti gert lauslega ráð fyrir því að hálfur milljarður að hálfur milljarður félli til á þessu ári og það þarf auðvitað að gera grein fyrir þeim hálfa milljarði með viðauka með fjárhagsáætlun. En restin mun falla til á næsta ári og það verður auðvitað bara unnið samhliða gerð fjárhagsáætlunar fyrir 2015,“ segir Guðríður.

Bæjarstjóri verði að fylgja samþykktum bæjarstjórnar enda séu þær leiðarljós hans sem framkvæmdastjóra bæjarins.Honum beri að framfylgja samþykktum bæjarstjórnar þótt hann sé persónulega ekki sammála þeim.

Og þið munið fylgja því eftir á næsta bæjarstjórnarfundi og í bæjarráði, eða hvað?

„Að minnsta kosti á næsta bæjarstjórnarfundi. Það verður að segjast eins og er að það er flóknara að fylgja því eftir í bæjarráði. Vegna þess að við erum ekki með meirihluta fyrir málinu inni í bæjarráðiþótt við séum með meirihluta fyrir málinu í bæjarstjórn. Það situr bara hluti bæjarfulltrúa í bæjarráði,“ segir Guðríður Arnardóttir.