Ísland liggur vel fyrir alþjóðlega leitar- og björgunarmiðstöð

Stærsta norðurslóðaráðstefna sem haldin hefur verið fer nú fram í Tromsö í Noregi og telja menn þar að Ísland gæti verið ákjósanlegur staður fyrir alþjóðlega björgunarmiðstöð á Norðurslóðum. Sjávarútvegsráðherra Noregs er hins vegar fastur fyrir í makríldeilunni.

Norðurslóðaráðstefnan Artic Frontiers fer nú fram í Tromsö í Noregi og er þetta í fyrsta skipti sem ráðstefna sem þessi er haldin og er hún sú stærsta sem haldin hefur verið, með um þúsund fulltrúum frá 35 löndum. Svavar Hávarðsson blaðamaður hjá 365 fylgist með ráðstefnunni ytra. Hann segir aðal viðfangsefnið vera fólk á norðurslóðum og þá sérstaklega heilsufar og nýting auðlinda. En makríldeila Íslendinga og Norðmanna bar einnig á góma í ræðum Gunnars Braga Sveinssonar utanríkisráðherra og Elísabetar Aspaker sjávarútvegsráðherra Norðmanna.

„Þau komu hér í pontu hvort á fætur öðru og Gunnar Bragi minnti náttúrlega á það að makríllinn er í okkar lögsögu í þrjá mánuði á ári og étur sig feitan þar, eða um tvær milljónir tonna. En Aspaker lagði mikla áherslu á þá grundvallarhugsun Norðmanna að makríllinn væri stofn sem væri meirihlutan af hverju ári í norskri lögsögu og þess vegna myndu þeirri ekki hnika neitt frá því grundvallarsjónarmiði sínu að veiði á stofninum yrði deilt á þeirra forsendum,“ segir Svavar.

Það sé því ekki ástæða til bjartsýni á samningafundi í makríldeilunni sem fram fer á morgun. Evrópusambandið hefur fyrir sitt leiti samþykkt 12 prósent af veiðunum til Íslendinga, en Norðmenn telja það allt of mikið.

„Ég held að það hafi ekki farið á milli mála að það sé óaðgengilegt varðandi Norðmennina. Alla vega tala þeir á þeim nótum,“ segir Svavar.

Utanríkisráðherra mælti fyrir því að alþjóðleg björgunarmiðstöð yrði staðsett á Íslandi í samstarfi við ríki á norðurslóðum og Atlantshafsbandalagið, en Sigmundur Davíð Gunnlaugsson forsætisráðherra ræddi þessa hugmynd við Anders Fogh Rasmussen framkvæmdastjóra NATO í haust. Svavar ræddi þessi mál við Sturlu Hendriksen sem er yfir félagi skipaeigenda í Noregi.

„Og hann tók undir það mjög sterkt að staðsetning Íslands væri með þeim hætti að því myndi fylgja miklir möguleikar fyrir Íslendinga. Það væri ekki bara varðandi bjögunarmálin heldur líka fyrir viðskipti og alþjóðlegar siglingar. Hann taldi mjög raunhæft, eins og Gunnar Bragi minnti á, að byggja upp aðstöðu fyrir leit og björgun á Íslandi og hafnir fyrir viðskipti,“ sagði Svavar Hávarðsson blaðamaður sem staddur er á Norðurslóðaráðstefnunni í Tromsö í Noregi.