Formaður efnahagsnefndar margsaga

Formaður efnahags- og viðskiptanefndar hefur á einni viku gefið þrjár mismunandi útskýringar á því hvernig talan fimmtíu milljarðar króna varð til sem frískuldamark bankaskattsins.

Fréttastofa Stöðvar 2 flutti fyrst fréttir af bankaskattinum, 12.janúar í ljósi þess að við breytingar á bankaskattinum, þar sem skattleysismörk upp á fimmtíu milljarða af heildarskuldum fjármálafyrirtækja í slitameðferð voru sett inn, nýtast einum banka, MP banka, betur en öðrum. Fyrst var stungið upp á við nefndina í áliti frá Sparisjóðunum að hafa frískuldamark á bankaskattinum og voru bæði þrír og sjö milljarðar nefndir.

Í ljósi þess að frískuldamarkið var síðar ákveðið, 50 milljarðar króna leitaði fréttastofa svara við því hvernig sú tala varð til. Í viðtali hjá okkur þann 12.janúar sagði Frosti Sigurjónsson, formaður efnahags- og viðskiptanefndar þetta:

„Ég veit ekkert um hvernig sem sagt þessi tala verður til. Hún kemur bara frá fjármálaráðuneytinu,” sagði Frosti Sigurjónsson í fréttum Stöðvar 2 þann 12.janúar.

Viku síðar var þessi fullyrðing borin undir Bjarna Benediktsson, fjármálaráðherra.

„Það kom ekkert frumkvæði frá fjármálaráðuneytinu að einstökum fjárhæðum í þessu efni,” sagði Bjarni, 19.janúar.

Síðar sama dag var Frosti aftur spurður, hvar fæddist þessi tala?

„Hún kemur þá bara til frá þeim starfsmönnum sem koma frá ráðuneytinu. Þeir sögðu orðrétt, ef við skoðum fimmtíu milljarða þá eru þetta afleiðingarnar af því. Nefndin gerði ekki athugasemdir við það og þá festist þessi tala,” sagði Frosti.

Viðskipta og efnahagsnefnd fundaði um málið í gærmorgun. Eftir hann var formaður enn á ný spurður:

„Hvernig kom þessi tala til, er það orðið ljóst núna?”

„Já, það er nokkuð ljóst að nefndarmeirihlutinn í nefndinni biður fjármálaráðuneytið um tölu sem nær því markmiði að undanskilja minni fjármálastofnanir þessum bankaskatti og gerir það með ákveðnum rökum.”

Eftir stendur að erfitt er að átta sig hvaðan þessi tala á uppruna sinn. En skiptir það máli þegar takmarkið að hlífa minni fjármálastofnunum er náð? Já, segja margir, sérstaklega í ljósi þess að skattgreiðslur eins viðskiptabanka lækka um 78 prósent. Ef frískuldamarkið var ekki sérsniðið að MP banka, hvers vegna er svona erfitt að gera grein fyrir því hvers vegna það er fimmtíu milljarðar en ekki sjö eins og ein af minni fjármálastofnunum lagð til.