Samfylkingin í sókn

Samfylkingin sækir í sig veðrið samkvæmt nýrr skoðanakönnun MMR.

Könnunin var framkvæmd af MMR dagana 9. – 15. janúar og var heildarfjöldi svarenda 981 einstaklingur, átján ára og eldri.

Mesta breytingu frá fyrri könnun er að finna hjá Samfylkingunni en þann 17. desember síðastliðinn mældi MMR flokkinn með 13,6 prósenta fylgi en í dag mælist flokkurinn með 17,1 prósent.

Sjálfstæðisflokkurinn bætir við sig einu prósentustigi og mælist nú með 26,3 prósent.

Framsóknarflokkur stendur nokkurn veginn í stað og fengi 17 prósenta fylgi yrði gengið til kosninga nú.

Björt Framtíð bætir við sig einu prósentustigi frá fyrri könnun og fengi rétt tæp 16 prósent samkvæmt könnun MMR.

Hjá Pírötum og VG dalar fylgið hins vegar. VG fer niður 1,5 um prósentustig og fengi flokkurinn 11 prósent í kosningum í dag. Hjá Pírötum er fallið öllu meira, í desember mældist flokkurinn með 9 prósent, en í nýju könnuninni fá þeir 6,9 prósent.