Ætlar að endurskoða reglur um siðferðismat

Illugi Gunnarson menntamálaráðherra ætlar að endurskoða reglur um að kennarar gefi grunnskólanemendum einkunnir fyrir meðal annars persónulega þætti og siðferðileg viðhorf.

Gefa á grunnskólanemendum sem útskrifast úr 10. bekk einkunnir fyrir persónulega þætti og siðferðileg viðhorf á næsti ári samkvæmt nýrri aðalnámsskrá sem samþykkt var á síðasta kjörtímabili.

Fram kemur í Fréttablaðinu í dag að skiptar skoðanir eru um málið meðal skólastjóra. Hilmar Hilmarsson, skólastóri Réttarholtsskóla, segir í samtali við blaðið að það sé hvorki á færi skólastjórnenda né kennara að leggja dóm á persónuleika nemenda.

Illugi hefur sagt að ekki komi til greina að gefa umsögn um sambærilega þætti á prófskírteini framhaldsskólanema. Hann er sömu skoðunar hvað varðar grunnskólanema.

„Það er nú meðal annars þess vegna sem að við tókum þá ákvörðun að fresta innleiðingu á þessu nýja kerfi til þess að gefa svigrúm til þess að skoða þetta betur. Það var búin til ný námsskrá sem leggur meiri áherslu á það sem er kallað hæfni nemenda og þar eru ýmiss matskennd atriði. Í sjálfu sér er það ágætt en það er mjög erfitt að ætla að fara gefa umsagnir eða einkunn fyrir slíka þætti. Ég er þeirrar skoðunar sjálfur að það sé mun betra að horfa fyrst og síðast til þess að mæla með hefðbundnum hætti færni nemenda með gamla laginu. En að sjálfsögðu er það þannig að skólastarfið hefur þróast í þessa átt. Við viljum auðvitað að í skólanum sé lögð áhersla á fjölmargt annað heldur bara einhverja grunnfærni en einkunnagjöfin hlýtur að þurfa að vera þannig kerfi sem mark er takandi á og er ekki um of háð mati einstakra kennara og þeirra lífsskoðunum,“ segir Illugi.

Hann ætlar að endurskoða þessar breytingar.

„Þess vegna byrjaði ég á því að fresta innleiðingunni. Tók ákvörðun um það fyrir nokkru síðan. Það gefur okkur svigrúm til að fara yfir þetta mál. Ég er frekar á þeirri línu að það sé eðlilegra að við séum að gefa umsagnir eða mat með hefðbundnari hætti,“ segir Illugi.