Saka Frosta um að koma óorði á Alþingi

Þingmenn stjórnarandstöðunnar gagnrýndu Frosta Sigurjónsson, formann efnahags- og viðskiptanefndar Alþingis og þingmann Framsóknarflokks, harðlega á Alþingi í dag fyrir að verða margsaga um tilurð frískuldamark bankaskatts í fjölmiðlum.

Kristján L. Möller þingmaður Samfylkingarinnar segir að misvísandi fullyrðingar Frosta hafi komið óorði á Alþingi.

„Þessi margsögn háttvirts þingmanns um það hvernig þetta var gert vekur mér óhug. Hvort að það er slys, óhapp, slæm eða slæleg vinnubrögð allavegana er þetta hið versta mál og í raun og veru kemur óorði á störf Alþingis. Það verður bara að segjast eins og er,“ sagði Kristján L. Möller.

Bjarkey Gunnarsdóttir þingmaður Vinstri grænna tók í svipaðan streng.

„Er það þannig og ætti það að vera þannig að formaður efnahags- og viðskiptanefndar bæði þjóðina afsökunar á því að hafa sagt hér opinberlega ósatt og vera meira segja tvísaga strax eftir fundinn á mánudaginn í viðtali við annars vegar Vísi og hins vegar mbl?“ sagði Bjarkey Gunnarsdóttir, þingmaður Vinstri grænna.