Samþykkja nýgerða kjarasamninga

Meirihluti aðildarfélaga í Landssambandi íslenska verslunarmanna samþykkti nýjan kjarasamning við Samtök atvinnulífsins í atkvæðagreiðslu sem nú er lokið. Kjörsókn var víðast hvar mjög dræm.

Þau félög sem samþykktu samninginn eru VR, Félag verslunar- og skrifstofufólks Akureyri, Verslunarmannafélag Suðurlands, Verslunarmannafélag Skagafjarðar og deildir hjá Vlf. Vestfjarða, Stéttarfélaginu Samstöðu og Stéttarfélagi Vesturlands.

Samningurinn var felldur hjá Verslunarmannafélagi Suðurnesja og í deildum Afls starfsgreinafélags, Vlf. Snæfellinga, Vlf. Þórshafnar og Framsýnar stéttarfélags.

Um 95% félagsmanna landssambandsins eru í þeim félögum sem samþykkt hafa samninginn.

Samningsumboð þeirra félaga sem felldu samninginn er því komið til félaganna á nýjan leik og óvíst á þessu stigi hvernig verður á málum haldið í framhaldinu.