Fegrunaraðgerðir á forsíðunni

Það er ekkert nýtt að átt sé við ljósmyndir sem birtast á síðum tímarita. Hinsvegar fór forsíða á nýjasta tölublaði Vogue fyrir brjóstið á mörgum, þar sem gagnrýnendum fannst helst til langt gengið í að lagfæra útlit fyrirsætunnar. 

Forsíðustúlkan er nefnilega leikkonan, handritshöfundurinn og leikstjórinn Lena Dunham, sem alla tíð hefur verið ötull talsmaður þess að konur fái að vera eins og þær eru, sama hvernig þær líti út og hvaða fatastærð þær noti.

Á vefmiðlinum Jezebel birtist meðal annars gagnrýni á myndirnar og þar lofuðu hæstráðendur rúmri einni milljón íslenskra króna í verðlaunafé hverjum þeim sem gæti útvegað upprunalegu myndirnar úr myndatökunni fyrir Vouge.

Á upprunalegu myndunum má sjá að talsvert hefur verið átt við Dunham á myndunum sem í blaðinu birtust, umfram hefðbundna myndvinnslu fyrir tímarit.

Dunham segist þó sjálf lítið skilja í gagnrýninni, og segir að allir sem vilji sjá hana í sínu rétta ljósi ættu að horfa á sjónvarpsþættina hennar, Girls.

Hún segist vona að öllum sé ljóst að Vogue birti ekki raunveruleikann eins og hann er, heldur fegraða útgáfu af fólki, fatnaði og fleiru.

Á meðfylgjandi myndskeiði má sjá blaðamann bregða sér í töfraheim myndvinnsluforritsins PhotoShop.