Gjald sett á gönguskíðabrautina

Gjald verður tekið fyrir notkun á gönguskíðabrautinni í Hlíðarfjalli frá og með næstu mánaðarmótum. Einn dagur í brautinni mun kosta 500 krónur og vetrarkort 10.000 krónur. Þetta kemur fram í tilkynningu frá Akureyrarbæ.

Í tilkynningunni segiri að gönguskíðabrautinni sé mjög vel við haldið þegar snjór er í fjallinu. Hún sé troðin með fullkomnum snjótroðurum þegar þurfa þykir og sé flóðlýst þegar dimma tekur.

Guðmundur Karl Jónsson, forstöðumaður skíðasvæðisins í Hlíðarfjalli, segir rástöfunina óhjákvæmilega í ljósi þess kostnaðar sem til fellur. „„Það kostar um sex milljónir króna á ári að viðhalda gönguskíðabrautinni og með þessu mjög svo hóflega gjaldi teljum við okkur geta náð inn fyrir um helmingnum af því.“

„Það er ekki síður kostnaðarsamt að viðhalda gönguskíðabrautum en öðrum skíðabrautum og okkur er því varla stætt á því að innheimta gjald í skíðalyfturnar en ekki í gönguskíðabrautirnar sem þurfa einnig sitt viðhald, troðslu og lýsingu ásamt fleiru. Þessi breyting getur hitt einhverja óþægilega fyrir en rétt er að benda á að með þessu er þjónustan líka fest í sessi sem er mikilvægt. Fólk er einfaldlega að greiða fyrir góða þjónustu.“