60 þúsund „burpees“ til minningar um látna vinkonu

„Við tókum alls 47355 „burpees“ til minningar um Dagnýju,“ segir María Rún Þorsteinsdóttir einn þjálfara hjá Crossfit Hengli, í Hveragerði. María og hinir þjálfararnir hjá Hengli fengu þá hugmynd að minnast Dagnýjar Aspar Runólfsdóttur sem lést í bílslysi í desember. Dagný Ösp var dugleg að æfa Crossfit, stundaði það af kappi á stöðinni. Crossfittarar í Hveragerði framkvæmdu tuttugu og eina „burpees“ æfingu á dag í 21 dag, því Dagný var 21 árs þegar hún lést.

Dugnaður þeirra í Hveragerði spurðist út og í gær ákváðu enn fleiri að framkvæma þessa erfiðu æfingu. „Í gær fréttu fleiri stöðvar af þessu og fullt af fólki var með í þessu átaki. Við erum ekki með jafn nákvæma talningu yfir hversu mörg „burpees“ voru framvkæmd, en þetta var eitthvað í kringum 15 þúsund, á einum degi. Fimleikafélagið Gerpla tók líka þátt í þessu með okkur, þær gerðu 315 stykki og tóku heljarstökk á milli,“ útskýrir María Rún og því ljóst að æfingarnar eru orðnar vel yfir 60 þúsund, sem gerðar hafa verið í minningu Dagnýjar.

Hún segir einstaklega góða samstöðu hafa myndast í þessu átaki hjá þeim í Hengli. „Yfirleitt þegar svona átak er í gangi er fólk að gera „burpees“ hvert í sínu horni. En í þessu átaki voru allir nánast alltaf allir saman. Ef fólk komst ekki þá gerði þetta samt heima en ég tók eftir því að fólk lagði mikið á sig til þess að vera með og mættu bara með börnin með sér á æfingar,“ segir María.

Á afmæli Dagnýjar, þann 20. janúar, bættu Crossfittararnir svo í og fjölguðu „burpees“ æfingum upp í 22, því Dagný hefði orðið 22 ára þann dag. María Rún reiknar með því að þetta verði að árlegu átaki hjá þeim í Hengli. „Við bjuggum líka til æfingu sem heitir Dagný á afmælisdaginn hennar. Svona viljum við minnast þessarar duglegu og yndislegu vinkonu,“ segir María.

Í myndbandinu hér að neðan geta lesendur glöggvað sig á hvernig „burpees“ æfing er framkvæmd.