Óvissa um framhald viðræðna

„Það er óvissa um hvert framhaldið verður. Við höfðum skynjað að bæði ríki og sveitafélögin voru að bíða eftir niðurstöðu úr atkvæðagreiðslu ASÍ félaganna,“ segir Þórður Hjaltested formaður Kennarasambands Íslands og bætir við að þetta sé furðuleg staða. „Menn eru að melta niðurstöðuna úr atkvæðagreiðslunni og reyna að vega og meta hvað hún þýðir.“

Um helmingur félagsmanna í aðildarfélaga Alþýðusambands Íslands felldi í gær kjarasamning sem skrifað var undir í desember. Óvissa ríkir um hvert framhald kjaraviðræðna verður. Í febrúar var ætlunin að hefja gerð kjarasamnings til lengri tíma á almenna vinnumarkaðnum en forseti Alþýðusambandsins sagði í gær að þær áætlanir væru í uppnámi.

Þórður segir að viðræður við kennara hafi ekki verið komnar á skrið, það hafi ekki verið kominn neinn þungi í þær.

„Þetta eru fyrstu alvöru kjaraviðræður kennara frá því að ný lög um menntun kennara tóku gildi  en nú verða þeir að ljúka fimm ára háskólanámi til að fá réttindi til að kenna. Þessar viðræður skipta því miklu máli,“ segir Þórður og bætir við að kennarar séu tilbúnir að semja til lengri tíma að því skildu að laun þeirra verði kerfisbundið hækkuð á tímabilinu.

Hann segir að kennarar hafi ekki nefnt neinar prósentutölur hvað varðar hækkun launa þeirra, þeir hafi talað fyrir þjóðarsátt um leiðréttingu launa. Í tveimur skýrslum OECD sé bent á að það verði að bæta kjör kennara ef eðlileg endurnýjun eigi að vera í stéttinni og ungt fólki kjósi að gera kennarastarfið að ævistarfi.

„Það hefur hins vegar legið fyrir ef það á að leiðrétta kjör kennara til samræmis við stéttir sem hafa sambærilega menntun þá þarf að hækka laun þeirra um meira en 2,8 prósent eins og samið var um á almenna markaðnum,“ segir Þórður.