Karlmaður á níræðisaldri dæmdur fyrir kynferðisbrot

Héraðsdómur Vestfjarða hefur dæmt karlmann á níræðisaldri í fjögurra mánaða fangelsi, skilorðsbundið til tveggja ára, fyrir kynferðisbrot.

Maðurinn særði blygðunarsemi mæðgina ítrekað þegar hann stóð nakinn fyrir innan glugga á heimili sínu og strauk á sér getnaðarliminn. Þá vakti hann athygli þeirra á sér með því að banka á rúðu og kveikja ljós.

Móðirin, sem nú er látin, tók myndbönd frá gluggum á heimili sínu og voru skýrslur þar sem innihaldi myndbandanna var lýst meðal gagna sem lögð voru fram í málinu. Hún hafði afhent félagsmálastjóra myndböndin sem hafði síðan samband við lögreglu.

Dánarbú móðurinnar tók yfir kröfu hennar en núverandi forráðamenn sonarins tóku yfir kröfu fyrir hans hönd. Maðurinn var auk fangelsisrefsingarinnar dæmdur til að greiða dánarbúi móðurinnar miskabætur að upphæð 250 þúsund krónur og syninum 200 þúsund krónur. Þá var hann dæmdur til að greiða allan sakarkostnað, alls 1.212.958 krónur.