Enn gert hlé á makrílviðræðum

Ekki náðist niðurstaða á samningafundi milli Íslands, Færeyja, Evrópusambandsins og Noregs en honum lauk um hádegisbil í dag.

Samningaviðræður um skiptingu aflahlutar milli strandríkja á makríl hafa staðið síðan 2008.

Ísland boðaði til samningafundar í september síðastliðinn í kjölfar ráðgjafar Alþjóða hafrannsóknarráðsins í haust sem gefur til kynna að ástand makrílstofnsins sé betra en talið var. Bætt ástand stofnsins hefur gefið tækifæri á að þoka viðræðunum í samkomulagsátt.

Sigurður Ingi Jóhannsson, sjávarútvegsráðherra kveðst minna bjartsýnn nú en hann var á haustmánuðum en engu að síður sé mikilvægt að reyna til þrautar að ná samkomulagi.

Afstaða Íslands byggi hér eftir sem hingað til á því að samkomulag sem byggi á vísindalegum grunni náist. Bæði hvað varðar hæfilegar veiðar úr stofninum og sanngjarnari skiptingu aflahlutar milli ríkjanna en á undanförnum árum hefur makríll leitað í síauknum máli í íslenska lögsögu eftir fæði.