Stafræn bylting í Breiðholti

Fimmta Fab Lab smiðja landsins var opnuð í Breiðholti í dag. Breiðhyltingar og aðrir borgarbúar get nú hrint hugmyndum sínum í framkvæmd með hjálp fagmanna. Formaður borgarráð sýndi lipra takta með laserskera við opnun Fab Lab smiðjunnar í Eddufelli.

Fjallað var um smiðjuna í kvöldfréttum Stöðvar 2 í kvöld. Japaninn ungi Takuma Oami leyfði fréttamanni að spreyta sig á uppfinningu sinni og það tók aðeins um eina mínútu að skera út merki Stöðvar 2 með laserskera. Þetta er þó aðeins brot af þeim hugmyndum sem hægt er að koma í framkvæmd með einföldum hætti í Fab Lab eða framköllunarstofu hugmynda sem opnaði í Breiðholti í dag.

Frosti Gíslason hefur verið aðal driffjöðrinn í framþróun Fab Lab á Íslandi sem er nú með vinnusmiðjur á fimm stöðum á landinu. „Það sem er svo skemmtilegt við Fab Lab er að þar deila allir þekkingu sinni á milli manna og það er ætlast til þess þú deilir líka þinni þekkingu. Við hjálpumst öll að við að framkalla hugmyndir hvers annars,“ segir Frosti.

Dagur B.  Eggertsson, formaður borgarráðs, er með stórt hjarta en hann nýtti sér aðstöðuna í Fab Lab í Breiðholti til að setja í framkvæmd fallega gjöf til stjórnenda smiðjunnar. Búast má við mikilli framkvæmdagleði meðal Breiðhyltinga.

„Það er draumur að rætast. Þetta er mjög spennandi og gefur okkur mikið tækifæri,“ segir Guðrún Hrefna Guðmundsdóttir, skólameistari Fjölbrautaskólans í Breiðholti. „Þeir kennarar sem hafa komið með nemendur sína hingað inn þeir tala um að nemendur fáist ekki út aftur. Það er algjörlega nýtt því yfirleitt bíða nemendur eftir því að tíminn klárist.“

Nánar um málið í myndbandinu hér að ofan.