Forsætisráðherra telur raunhæft að afnema verðtrygginguna alveg

Forsætisráðherra telur raunhæft að ná því markmiði að afnema verðtrygginguna að fullu. Horft verði bæði til meiri- og minnihlutaálits verðtryggingarnefndar við mótun aðgerða. Fyrrverandi fjármálaráðherra segir  tillögurnar langt frá kosningaloforðum Framsóknarflokksins.

Spurningin um verðtryggingu eða ekki verðtryggingu snýst um möguleika almennings til að eignast íbúðarhúsnæði á sanngjörnum kjörum. Nefnd forsætisráðherra leggur til að verðtryggingin verði afnumin í tveimur áföngum en markmiðið er að koma í veg fyrir óhóflega höfuðstólshækkun lána. Hins vegar er algerlega óvist hvort greiðslubyrði lækki eitthvað við þessar aðgerðir.

Vilhjálmur Birgisson sem sæti átti í nefndinni leggur reyndar til að verðtryggingin verði að fullu afnumin í júní á þessu ári og skilaði séráliti.



Gengur þessi tillaga nefndarinnar nógu langt miðað við það sem Framsóknarflokkurinn boðaði fyrir kosningar?

„Nefndin skiptist í tvennt. Það eru tvö álit og munurinn virðist fyrst og fremst liggja í því hversu hratt þau telja að óhætt sé að afnema verðtrygginguna. Þannig að meirihlutinn er mjög afdráttarlaus í sínum lýsingum á þeim göllum sem fylgja verðtryggingunni og mikilvægi þess að afnema hana,“ segir Sigmundur Davíð Gunnlaugsson forsætisráðherra.

Meirihlutinn telji hins vegar skynsamlegra að gera þetta í skrefum. Forsætisráðherra segir að horft verði til beggja álita við mótun aðgerða. Með afnámi verðtryggðra lána til 40 ára gæti ungu og tekjulágu fólki reynst erfitt að eignast sitt fyrsta húsnæði og segir forsætisráðherra horft til þess í vinnu húsnæðishóps ríkisstjórnarinnar.

„Til þess eru ýmis ráð sem eru til skoðunar. En verst er fyrir þennan hóp að taka lán sem eru í raun dýrasta lánsformið og setja fólk í erfiða fjárhagslega stöðu í fjörtíu ár,“ segir forsætisráðherra.

„Þetta er náttúrlega afar takmörkuð aðgerð og langt frá loforðunum um að afnema verðtryggingu eða breyta í einhverjum grundvallaratriðum fyrirkomulagi þessara mála. Þarna er lagt til að setja aðeins meiri skorður á veitingu verðtryggðra neytendalána,“ segir Steingrímur J. Sigfússon þingmaður Vinstri grænna og fyrrverandi fjármálaráðherra.

Það hafi menn lengi talað um.  Tillögurnar séu hins vegar langt frá kosningaloforðum Framsóknarflokksins.

„Það vekur einnig athygli mína að menn skuli þá ekki vera hugmyndaríkari og velta upp fleiri möguleikum eins og t.d. að setja þak á verðtryggð lán. Það gæti verið valkostur sem hentaði sumum, að taka verðtryggð lán en þau væru varin fyrir því að höfustóllinn hækkaði meira en t.d. um 4% á ári,“ segir Steingrímur.

Forsætisráðherra telur hins vegar raunhæft að afnema verðtrygginguna með öllu.

„Hvort sem menn líta til minnihlutaálitsins eða meirihlutaálitsins tel ég að það sé hægt að ná þessu markmiði,“ segir Sigmundur Davíð Gunnlaugsson forsætisráðherra.