Grímur Atlason sækist eftir fyrsta sæti hjá VG

Grímur Atlason, framkvæmdastjóri Iceland Airwaves og fyrrverandi bæjarstjóri Bolungarvíkur, tilkynnti á Facebook-síðu sinni fyrr í kvöld að hann hyggðist bjóða sig fram til að leiða lista Vinstri Grænna í borgarkosningum nú í vor.

„Ég er búinn að hugsa um þetta og spyrja fólk,“ segir Grímur um ákvörðun sína. „Ég er í mjög skemmtilegu verkefni núna, þannig maður þarf að hugsa sig um áður en maður gefur sig út fyrir að ætla kannski að ganga frá því, þó það sé alls ekki neitt í hendi með það.“

Þær Sóley Tómasdóttir og Líf Magneudóttir hafa þegar boðið sig fram í fyrsta sæti á lista VG og segir Grímur sér lítast vel á samkeppnina.

„Þetta er bara gott fólk, ég vildi bjóða upp á sjálfan mig til að hafa breidd í þessu,“ segir hann léttur í bragði. „Það er mikilvægt að fólk hafi um eitthvað að velja.“

Grímur ákvað að láta stutt og laggott myndband á Facebook nægja til að láta vita af framboði sínu. Hann segir þessa sniðugu leið hafa legið beint við.

„Ég var bara að borða pítsu með fjölskyldunni, í þessum stól,“ segir Grímur. „Þetta er bara skemmtilegt.“

Grímur bauð sig einnig fram fyrir Vinstri Græna fyrir Alþingiskosningarnar 2009. Hann er menntaður þroskaþjálfi og er einnig þekktur fyrir leik sinn með rokksveitum á borð við Rosebud og Drep.