Nína Björk og félagar enn í fallhættu

Nína Björk Arnfinnsdóttir skoraði eitt mark þegar Levanger tapaði 24-18 í hörkuleik gegn Stabæk í norsku úrvalsdeildinni í handbolta.

Levanger, sem er í næstneðsta sæti sem er fallsæti, hélt í við heimakonur þar til staðan var 14-14. Þá skoruðu leikmenn Stabæk sjö mörk gegn einu og breyttu stöðunni í 21-15. Eftirleikurinn var auðveldur.

Nína Björk og félagar hafa verið á uppleið undanfarið og unnu afar óvæntan sigur á Storhamar í síðustu umferð. Liðið hefur unnið tvo sigra í fjórum síðustu leikjum en höfðu áður tapað fyrstu átta leikjum tímabilsins.