Vill afnema verðtryggingu eins hratt og mögulegt er

Forsætisráðherra vill afnema verðtryggingu eins hratt og mögulegt er. Hann segir að bæði meirihluta- og minnihlutaálit sérfræðinefndar um verðtryggingu boði að verðtryggingin verði afnumin. Sigmundur Davíð Gunnlaugsson forsætisráðherra var gestur á Sprengisandi á Bylgjunni í morgun.

„Sem betur fer þá er meginmunurinn minnihlutans og meirihlutans í nefndinni tímafaktorinn, þ.e.a.s. hversu langan tíma þau telja að það muni taka að afnema verðtryggingu. Þarna erum við með tvenns konar álit sem bæði marka gríðarleg tímamót og fela bæði í sér að afnema verðtrygginguna. Ég vil að þetta gerist eins hratt og mögulegt er án þess að skapa hættur,“ sagði Sigmundur Davíð á Sprengisandi í morgun.

Meirihluti sérfræðinefndar um verðtryggingu sagði í áliti sínu að ekki sé hægt að afnema verðtryggingu nema við viss skilyrði. Sigmundur Davíð telur hins vegar að það sé tiltölulega einföld framkvæmd að afnema verðtrygginguna.

„Við viljum ekki að þetta leiði til slysa, að þetta leiði til þess að fólk lendi í verulegum greiðsluerfiðleikum vegna þess að greiðslubyrðin aukist til mikilla muna einn mánuðinn. Við förum hins vegar í þetta eins hratt og mögulegt er og ég held að í báðum álitum geti menn komist að þeirri niðurstöðu að það sé tiltölulega einföld aðgerð að afnema verðtryggingu.“