Meirihlutinn heldur og Sjálfstæðisflokkur missir mann

Núverandi meirihluti í borgarstjórn Reykjavíkur héldi öruggum meirihluta og sínum níu fulltrúum, ef kosið yrði núna, samkvæmt nýrri skoðanakönnun Félagsvísindastofnunar Háskóla Íslands fyrir Morgunblaðið.

Píratar eru á mikilli siglingu og fengju tíu og hálft prósent og einn borgarfulltrúa. Sjálfstæðisflokkurinn mælist með 25 prósent, sem er talsvert minna en í síðustu kosningum og myndi tapa einum fulltrúa.

Samfylkingin er hinsvegar á uppleið með tæplega 22 prósentustiga fylgi og myndi bæta við sig einum á kostnað Bjartrar framtíðar, arftaka Besta flokksins, sem mælist með rúm 29 prósent. Vinstri grænir mælast með rúm átta prósent og héldu sínum fulltrúa, en Framsóknarflokkurinn mælist með aðeins 2,8 prósent.