Hreindýr í stórhættu

Náttúrustofa skráði 31 hreindýr dauð eftir árekstra árið 2013 sem er jafn mikið og árið 2007. Önnur ár var minna um slík slys. Náttúrustofa Austurlands varar við því að hreindýr séu nærri flestum vegum á Austurlandi.

Náttúrustofa rekur að nú í byrjun árs sé hætta á að hitta á hreindýr samfelldr frá Mýrum og í Breiðdal. Í byrjun árs var keyrt á dýr í Álftafirði. „Reyðafjarðardýrin hafa undanfarið gengið mikið milli þorps og Holmaness, einkum í nágrenni álversins og nokkur dýr hafa þar lent fyrir bílum.“

Þá greinir Náttúrustofa Austurlands frá því að á Héraði hafi nokkuð borið á hreindýrum á Völlum og í Skriðdal, tarfahópur hefur sést við Eiða og hópur var út við Héraðssand. Einn kálfur lenti fyrir bíl stutt norðan Egilsstaða fyrir skömmu en þar höfðu ekki sést dýr fyrr. Dýr urðu fyrir bílum um hátíðarnar á Vopnafjarðarvegi og dýr er að finna við Háreksstaðaleið. „Á eftir desember er janúar næst hættulegasti mánuður ársins fyrir hreindýr í umferðinni,“ segja þau á Náttúrustofu Austurlands.