Strætisvagn rann stjórnlaust

Strætisvagn rann stjórnlaust á planinu í Mjódd seinni partinn í gær. Vagninn rann af planinu og yfir götu og stöðvaði loks í runna við plan á bensínstöðinni Olís. Þetta kemur fram í tilkynningu frá Strætó bs.

Tildrög slyssins voru þau að upphengja fyrir hurð á vagninum brotnaði og hann festist því í hurðarbremsu. Þegar hurðarbremsan var losuð kom í ljós að vagninn var í gír og rann hann því af stað.

Engir farþegar voru í vagninum en vagnstjórinn reyndi að komast upp í vagninn og slasaðist hann lítillega. Engin slys urðu á öðru fólki.

Strætisvagninn rakst utan í fólksbíl sem skemmdist, sömuleiðis varð tjón á skyggni bensínstöðvarinnar auk þess sem vagninn er skemmdur.

Strætó bs. harmar þetta atvik sem rekja má til mannlegra mistaka. Stefna fyrirtækisins er að öryggi sé ávallt sett umfram það að halda tímaáætlun og fyrirtækið mun fara ítarlega yfir öryggisferla til varnar því að svona gerist aftur.