Ófremdarástand gæti skapast á ferðamannastöðum

Samtök ferðaþjónustunnar  mótmæla boðuðum niðurskurði í landvörslu á Íslandi og þá sérstaklega í sambandi við síaukin fjölda ferðamanna hér á landi. Í tilkynningu sem SAF sendu frá sér fyrir helgi segir að landvarsla sé engan vegin undanskilin þeirri ábyrgð að auka þjónustu vegna fjölgunar ferðamanna.

 

„Niðurskurðurinn er furðulegur í ljósi síaukins fjölda ferðamanna til landsins en talað er um að niðurskurðurinn, þ.e. við störf í landvörslu í sumar, verði skorinn niður um hvorki meira né minna en helming. Sé það mælt í vinnuvikum,“ segir Helga Árnadóttir, framkvæmdastjóri SAF.

Samtökin fara fram á að stjórnvöld leggi aukið fjármagn í landvörslu og að fallið verði frá boðuðum niðurskurði. Að óbreyttu sé séð fram á ófremdarástand á svæðum sem dæmd hafa verið í hættu af Umhverfisstofnun.

„Starf landverða felst m.a. í að taka á móti gestum, hafa eftirlit með umgengni, veita viðeigandi fræðslu, og gæta að ákvæðum um friðlýsingar og náttúrulög þ.e. að þau séu virt sem og að halda við svæðum s.s. tjaldsvæðum.  Þetta eru einmitt störf sem maður hefði haldið að skiptu gríðarlega miklu máli nú þegar ferðamönnum fer ört fjölgandi ár frá ári og mikilvægi náttúruverndar aldrei meira.“

Þá hafa tekjur frá ferðaþjónustu farið vaxandi og tölur frá Ferðamálastofu gefi í skyn að skatttekjur verði að minnsta kosti 27 milljarðar fyrir árið 2013. „Þetta er gert á sama tíma og að atvinnugreinin þ.e. ferðaþjónustan er að skila meiri tekjum í ríkissjóð en nokkurn tíman áður.  Það er á ábyrgð okkar allra að styrkja innviðina ef atvinnugreinin á að geta vaxið og dafnað til framtíðar, því kom þessi frétt um áætlaðan niðurskurð sem þruma úr heiðskíru lofti,“ segir Helga.