Gunnar Bragi fundaði með aðstoðar Evrópumálaráðherra Noregs

Utanríkisráðherra, Gunnar Bragi Sveinsson, átti í dag fund með Ingvild Næss Stub, aðstoðar Evrópumálaráðherra Noregs. Á fundinum ræddu þau EES samninginn, framkvæmd hans og hagsmunagæslu innan EES samstarfsins.

Þau fóru yfir breytta stefnu Noregs í málefnum EES og þær aðgerðir sem ný norsk ríkisstjórn hefur gripið til í því skyni að efla þátttöku og hagsmunagæslu Noregs á vettvangi EES.

Utanríkisráðherra gerði grein fyrir breyttum áherslum nýrrar ríkistjórnar Íslands í Evrópumálum og lagði áherslu á mikilvægi EES samningsins, sem er grunnurinn að samstarfi Íslands við Evrópusambandið.

Ráðherrarnir voru sammála um mikilvægi þess að þétta enn frekar samstarf Íslands og Noregs á vettvangi EES með það að markmiði að efla hagsmunagæslu ríkjanna innan EES samstarfsins.