Vegagerðin hafnaði beiðni lögreglu um hálkuvörn

Vegagerðin neitaði að verða við ósk lögreglunnar á Akureyri undir miðnætti í gærkvöldi, um að Vegagerðin hálkuverði þjóðveginn um Moldhaugaháls, vegna hættulegrar hálku, sem þar hafði skyndilega myndast og olli vandræðum í umferðinni.

Þar valt fyrst bílaleigubíll með þremur erlendum ferðamönnum um borð, en engan sakaði. Þegar lögreglumenn voru þar á vettvangi, varð flutningabíll að draga úr hraða upp brekku, en rann þá til, stöðvaðist og komst hvorki lönd né strönd.

Annar flutningabíll, sem kom á eftir honum lenti í samskonar vandræðum, en hægt var að beina fólksbílum um hjáleið.

Lögreglumenn aðstoðuðu ökumennina við að koma keðjum undir flutningabílana, en óskaði jafnframt eftir aðstoð Vegagerðarinnar þar sem akstursskilyrði voru greinilega stórhættuleg. Lögreglan fékk þá þau svör að vegna fjárskorts væri ekki hægt að bregðast við óskinni.