Graðasti hundur í heimi

Andri Freyr Viðarsson útvarpsmaður á 9 mánaða franskan bolabít sem heitir Hemmi. Eins og flestir hundaeigendur elskar Andri Freyr sinn hund og var tregur mjög í taumi þegar Vísir falaðist eftir því að hann segði aðeins af þessum sérstaka hundi sínum, sagði að það væri nánast eins og flagga börnum sínum í blöðunum. En hann lét til leiðast þegar blaðamaður Vísis setti þumalskrúfurnar á hann.

Heitir í höfuð tveggja Hemma

Hemmi er ekki hefðbundið hundanafn; ekki eins og Snati, Vaskur eða Kátur en spurður segir Andri Freyr svo frá að ekki fyrir svo löngu missti þjóðin tvo frábæra Hemma sem voru báðir miklir gleðigjafar. „Hemma Feita, sem svo var kallaður, og Hemma Gunn. Ég þekkti þá báða þessa toppmenn og þar sem Hemmi minn er sjálfur mikill gleðigjafi þá kom ekkert annað til greina en að skýra hann í höfuðið á þessum perlum.“

Hemmi er í raun skáfrændi Tómasar, bolabítsins sem var ferðafélagi Andra í fyrstu Andri á Flandri-þáttaröðinni. „Tómas og foreldrar Hemma, þau Fríða og Felix, búa á sama heimili í Keflavík, eftir að ég sá Hemma, sem þá var nokkrra vikna hvolpur, gat ég ekki hugsað mér að taka hann ekki með mér heim. Þetta var ást við fyrstu sýn.“

Hjólar í allt sem hreyfist

Andri Freyr hefur sagt um Hemma sinn að þetta sé graðasti hundur í heimi. „Ég hef reyndar ekki fengið það staðfest en ég held að það hljóti að vera. Hemmi er alltaf með hann lafandi úti og skammast sín ekkert fyrir það. Svo slefar hann aldrei nema þegar hann er í kringum tíkur en þá slefar hann líka alveg svakalega. Ég vona að þetta eldist af honum annars þarf ég að grípa til aðgerða."

Hemmi á það til hlaupa á fætur vina Andra og riðlast þar á. „Ekki bara það, hann hjólar í allt sem hreyfist og virðist aldurinn engu skipta. Þetta er einlægt dýr sem hlustar á sínar þarfir og stundum á ekkert annað. Maður þarf stöðugt að fylgjast með honum en hann gefur svo mikið til baka að maður lætur sig hafa það.“

Migið á andlit Hemma

Andri Freyr, sem lætur sér fátt fyrir brjósti brenna og eer sjálfur eðlilegur náungi eins og Hemmi, segist ekki hafa lent í vandræðalegum uppákomum vegna þessarar yfirgengilegu ákefðar hundsins. „Ekki ég beint en Hemmi hefur svo sannarlega gert það en oftar en einu sinni hafa stærri hundar mígið á andlit hans án þess að taka eftir því. Þetta gerist þegar Hemmi er að nusa af kynfærum þeirra. Það má með sanni segja að það sé forleikur sem fer úrskeiðis. Flestum hundum öðrum veitist ekki erfitt að hlaupa hann af sér og það getur orðið ansi vandræðalegt þegar hann reynir að hlaupa á eftir þeim með hann beinstífann!“

Svo virðist sem franski bolabíturinn sé tískuhundur hinna frægu á Íslandi nú um þessar mundir því auk Andra Freys á Steindi Jr. einn slíkan, sem er tík, fjórum mánuðum yngri en Hemmi og samfeðra.