Náttúruverndarsinnar bjóða alþingismönnum í kaffi

Samtökin Landvernd hefur boðið alþingismönnum, náttúruverndarfólki og öðrum áhugasömum á myndasýningu og í kaffispjall á Austurvelli í dag á milli klukkan 18 og 19. Þetta kemur fram í tilkynningu frá samtökunum.

„Miklar framkvæmdir eru nú fyrirhugaðar á hálendi Íslands,“ segir í tilkynningunni. „Uppi eru hugmyndir um vel á annan tug virkjana með tilheyrandi háspennulínum, uppbyggða vegi um Kjöl og Sprengisand, að ógleymdri stórri háspennulínu yfir Sprengisand. Framkvæmdirnar, ef fram ná að ganga, munu eyðileggja hálendið í þeirri mynd sem við þekkjum það.“

Viðburðurinn er hluti af verkefninu Hálendið - hjarta landsins, en það er sérstakt baráttuverkefni til varnar hálendi Íslands sem hófst í september á síðasta ári.