Ekki hægt að sitja undir hótunum ESB í makríldeilunni

Sjávarútvegsráðherra segir ekki hægt að búa við hótanir Evrópusabandsins um refsiaðgerðir í makríldeilunni, en sjávarútvegsstjóri Evrópusambandsins hefur gefið Íslendingum viku til að fallast á tilboð sambandsins. Raðherra segir að ef samkomulag takist ekki muni Íslendingar gefa út sinn eigin kvóta fyrir veiðarnar í vor.

Maria Dominaki sjávarútvegsstjóri Evrópusambandsins lét hafa eftir sér í þýska tímaritinu Spiegel í gær að Íslendingar og Færeyingar hefðu út þessa viku til að fallast á tilboð Evrópusambandsins um 12 prósent hvort ríki af makrílkvótanum. Ef þjóðirnar gengju ekki að þessu myndi Evrópusambandið semja við Norðmenn eina og beita Færeyinga og Íslendinga refsiaðgerðum gæfu þeir út eigin kvóta.

Sambandið beitir Færeyinga nú þegar refsiaðgerðum en hefur ekki beitt þeim enn gagnvart Íslendingum en samningafundur stendur nú yfir í Björgvin í Noregi.

Sigurður Ingi Jóhannsson sjávarútvegsráðherra segir Íslendinga hafa lagt áherslu á vísindanlegan grunn og sjálfbærar veiðar í viðræðum við Evrópusambandið og Noreg undanfarin ár.

„Og miðað við nýjustu upplýsingar um göngumynstur, fæðustöðvar og hrygningar sé eðlilegt að horfa til þessara breytinga sem hafa orðið og málið eigi að nálgast í gegnum samningaviðræður en ekki hótanir um ólöglegar viðskiptaþvinganir sem ég verð að lýsa vonbrigðum mínum með, ef þær eru enn á ný komnar upp á borðið,“ segir sjávarútvegsráðherra.

Slíkar aðgerðir séu ólögmætar og ýti ekki undir möguleika á samkomulagi á meðan viðræður séu enn í gangi. Sigurður Ingi vill ekki staðfesta að Ísland geti sætt sig við þau 12 prósent sem Evrópusambandið býður.

„En við höfum nálgast og náðum ákveðnu samkomulagi eða samningsgrundvelli við Evrópusambandið í haust og settum málið því í raun inn í það samningaferli sem það er í nú í dag,“ segir Sigurður Ingi.

Norðmenn hafa ekki fallist á tilboð Evrópusambandsins til Íslendinga og Færeyingar hafa verið þverir gagnvart sambandinu. Ráðherra segir að Norðmenn þurfi að fara að íhuga orðspor sitt sem fiskveiðiþjóð sem stýri veiðum með sjálfbærum hætti, ætli þeir að halda sjónarmiðum sínum áfram.

En hvað gerist þá í lok þessarar viku?

„Það hefur öllum verið ljóst að þetta er síðasta mögulega leiðin til að ná samningum. Það styttist í veiðar á þessu ári. Ef það verður niðurstaðan (að samningar náist ekki) munum við skoða okkar afstöðu út frá þeim hagsmunum sem okkur ber,“ segir sjávarútvegsráðherra.

Ef ekki næst samkomulag í þessari viku munu Íslendingar þá gefa út sinn eigin kvóta eins og fyrri ár?

„Ég reikna með að það muni öll strandríkin gera, nema það komi eitthvað óvænt í ljós í dag eða á morgun,“ segir Sigurður Ingi Jóhannsson.