Píratar vilja halda í sinn mann í stjórn RÚV ohf

Píratar hafa sent út tilkynningu þar sem þeir vekja athygli á þeim áformum að Framsóknarflokkurinn vilji fjölga fulltrúum í stjórn RÚV á kostnað þeirra.

„Í dag kýs Alþingi að nýju í stjórn RÚV. Fyrir liggur að minnst tveir stjórnarmenn munu yfirgefa stjórnina, auk þess sem líklegt er að  fulltrúi Bjartrar framtíðar fari úr stjórn vegna framboðs til borgarstjórnar. Þeir tveir fulltrúar sem fullvíst er að yfirgefi stjórn RÚV eru annars vegar Magnús Geir Þórðarson, sem ráðinn hefur verið útvarpsstjóri og hins vegar fulltrúi Pírata, Pétur Gunnarsson, rithöfundur, sem sjálfstæðis- og framsóknarmenn ætla að fleygja úr stjórn til að koma fleiri fulltrúum að úr eigin röðum. Skipting stjórnarmanna í RÚV verður því eftir kosningu Alþingis; sex fulltrúar tilnefndir af stjórnarmeirihlutanum og þrír af minnihlutanum,“ segir í tilkynningu frá Pírötum.

Píratar segja að sinn fulltrúi, Pétur Gunnarsson, rithöfundur, hafi lagt gott eitt til í þrengingum RÚV undanfarin misseri og hafi látið til sín taka „til að sporna gegn afar óvinsælum gjörningum fyrrverandi útvarpsstjóra. Pírötum þykja það forkastanleg vinnubrögð að fleygja út þessum góða stjórnarmanni,  í ekki síst nú á þessum miklu breytingar- og umrótstímum hjá stofnuninni, með nýjan útvarpsstjóra og tiltölulega nýja stjórn, sem kosinn var í júlí sl. og nú mun taka jafnmiklum breytingum og lýst er hér að ofan.“

Píratar skora á stjórn RÚV að mótmæla þeim gerningi Sjálfstæðis- og Framsóknarflokks að fleygja góðum dreng úr stjórn RÚV og skora á þingheim að hafa frekar hagsmuni Ríkisútvarpsins að leiðarljósi í ákvörðunum sínum: „Þá hvetja Píratar einnig listafólk til að mótmæla með sama hætti því eins og kom fram í hjálagðri yfirlýsingu Pírata frá því í sumar, voru aðal- og varafulltrúi í stjórn RÚV tilnefndir, ekki síst með hagsmuni lista- og menningar í huga. Pétur Gunnarsson, rithöfundur, hefur verið ötull talsmaður lista og menningar í stjórninni og sárt að sjá eftir honum.“

Málið er á dagskrá þingsins uppúr klukkan 15:00 og víst er að margir sem láta sig málið varða munu fylgjast grannt með gangi mála. Þeirra á meðal er varamaður Pírata í stjórn, Lára Hanna Einarsdóttir þýðandi. Hún segir á Facebooksíðu sinni: „Til stendur af hálfu stjórnarflokkanna að vaða yfir lýðræðið, eina ferðina enn, og eigna sér enn einn fulltrúa í stjórninni þannig að stjórnarflokkarnir hafi þá 6 fulltrúa af 9 en Píratar engan. Þeir ætluðu að gera þetta í fyrrasumar en það mistókst hjá þeim. Tekst þeim þetta í dag?“

Innlegg by Lára Hanna Einarsdóttir.