Liggja undir skemmdum vegna rotnunar

Talsvert hefur borið á stækri ýldulykt á grónum svæðum á höfðuðborgarsvæðinu undanfarna daga. Bjarni Guðleifsson, fyrrum starfsmaður Landbúnaðarháskólans, er sérfræðingur á þessu sviði. Hann segir að uppruna lyktarinnar megi rekja til þess þyka klaka sem legið hefur yfir öllu undanfarnar vikur.

„Þegar gras og plöntur ná ekki að anda vegna klakans myndast koltvísýringur, ediksýra, smjörsýra og önnur efni. Þessi efni eru valdur af lyktinni sem finnst víða," segir Bjarni.

Hann segir ástandið býsna alvarlegt ef súrefnisleysið varir lengi. Þá geti grasið farið að drepast.

„Á fótbolta- og golfvöllum mega þetta ekki vera nema í mesta lagi tveir mánuðir áður en skemmdir fara að eiga sér stað. Það eru einmitt tímamörkin sem við erum komin að núna," segir Bjarni.

Ráðamenn knattspyrnu- og golfsambanda höfuðborgasvæðisins funduðu í dag til að fara yfir ástandið. Þeirra á meðal var Magnús Bjarklind, skrúðgarðyrkjumeistari.

Hann segist hafa mestar áhyggjur af því að kalskemmdirnar séu orðnar það miklar að við taki tímafrek og kostnaðarsöm uppbygging á fjölmörgum knattspyrnu- og golfvöllum á höfuðborgarsvæðinu.